Акафист Пресвятой Богородице перед Ея иконой, именуемой “Целительница”

Акафист Пресвятой Богородице перед Ея иконой, именуемой “Целительница”

Икона Пресвятой Богородицы «Целительница»

 


Кондак 1
     Избранной от всех родов Преcвятей Деве Богородице, явившейся иногда клирику болящу во еже исцелити его от болезни лютыя, похвальныя приносим пения: Ты же Всемилостивая Владычице, яко имущая державу непобедимую, от всяких бед и скорбей и болезней свободи ны зовущия Ти:
     Радуйся, Благодатная Целительнице душ и телес наших. 



Икос 1
     Архангел Гавриил, возвещая Пресвятей Деве Марии безсеменное зачатие от Нея Сына Божия, рече: Радуйся; Благодатная, Господь с Тобою, Благословенна Ты в женах, мы же грешнии гласу Архангелову подражати дерзающе c верою и любовию благоговением вопием пения сицевая:
     Радуйся, от начала веков во главу нашего спасения предизбранная;
     Pадуйся, многообразне от пророков предвозвещенная.
     Радуйся, Невесто Неневестная, заченшая Сына от Духа Святаго;
     Pадуйся, Mати в рождестве и по рождестве пребывшая Дево.
     Радуйся, одеющего светом яко ризою пеленами повившая;
     Pадуйся, млеком питавшая горняго и дольняго благодатию своею питающаго.
     Радуйся, на руку Твоею носившая Вседержителя;
     Pадуйся, о Промыслителе вceя твари попечение имевшая.
     Радуйся, паче всех от Него превознесенная;
     Pадуйся, честнейшая и славнейшая без сравнения всех небесных сил.
     Радуйся, Благодатная Целительнице душ и телес наших. 



Кондак 2
     Видяще Пресвятая Владычица усердные и благоговейные клирика Викентия на всяк день преклоняющаго колена пред честным Твоим образом и Архангельское приветствие Тебе приносящего, приняла еси таковое его благоугождение и даровала еси ему во дни болезни внезапное и дивное со одра восстание. Тем же и мы преклоняем колена душ и телес наших пред Цельбоносным Твоим образом, Госпоже наша Богородице, и поминающе чудное явление болящему клирику, вопием Сыну Твоему и Богу нашему: Аллилуиа. 



Икос 2
     Разумев чудесное исцеление от тяжкого недуга, клирик Викентий, восста с убогого ложе своего, иде в церковь и тамо песньми хвалебными прослави Тя Целительницу всех болящих, приими убо и от нас Мати Божия сии благохваления:
     Радуйся, от врат смертных неисцельно болящих к жизни возвращающая;
     Pадуйся, сострадания к страждущим преисполненная.
     Радуйся, пораженных различными недуги чудесно исцеляющая;
     Pадуйся, во всяких скорбех и печалех небесную отраду в сердца наша изливающая.
     Радуйся, любовию к Богу и ближним нас воодушевляющая;
     Pадуйся, от растлевающих душу и тело соблазнов мира сего сохраняющая.
     Радуйся, скорая услышательница усердно Тебе молящихся;
     Pадуйся, источающая великия милости и щедроты любящим Тя.
     Радуйся, уповающим на Тя вся потребная в животе сем дарующая;
     Pадуйся, ублажающих Тя в грозный час смерти не оставляющая.
     Радуйся, Благодатная Целительнице душ и телес наших. 



Кондак 3
     Силою данною от Тебе, Госпоже Царице и Владычице, Святая икона Твоя источает неоскудно исцеления страждущим от недуг многоразличных и несумненною верою к Ней притекающих, Богу же вопиющих: Аллилуиа. 



Икос 3
     Имущи премногую любовь к роду христианскому и матернее о нем попечение всем просящим у Тебе помощи и заступление, всякое благое прошение скоро исполняеши; сего ради Тебе Всемощней Заступнице и скорой Помощнице нашей приносим похвалы сия:
     Радуйся, скорбящих утешение;
     Pадуйся, безнадежных надеждо.
     Радуйся, труждающих помощь и укрепление;
     Pадуйся, нищих одеяние.
     Радуйся, алчущих питательнице;
     Pадуйся, обидимых и гонимых заступление.
     Радуйся, обидящих устрашительнице;
     Pадуйся, в христианской вере наставнице.
     Радуйся, взыскание погибших;
     Pадуйся, споручнице спасения грешных.
     Радуйся, от лукавых бесов мощное защищение.
     Радуйся, Благодатная Целительнице душ и телес наших. 



Кондак 4
     Бури страстей и похотей искушений бесовских избави нас, Премилосердная Богородице, укрепи и сохрани в нас до конца жизни нашея веру православную и преданность святей Церкви, да возможем невозбранно пети Господу Богу: Аллилуиа. 



Икос 4
     Слыша Господь на небеси Твоя о нас моления, Преблагая Владычице, исполняет скоро всякое прошение Твое, ведуще таковое матернее дерзновение к Сыну Твоему Иисусу Христу, вси к Тебе прибегаем и усердно молим Тя, предстательствуй за нас, многогрешных рабов Твоих, пред Всемогущим Создателем нашим, да не погубит нас со беззаконьми нашими, но да подаст нам оставление прегрешений, вопиющих Тебе из глубины души:
     Радуйся, предстательнице пред Богом мир от бед спасающая;
     Pадуйся, Сына Твоего на милость к нам недостойным преклоняющая.
     Радуйся, от запаления огненнаго росою молитв Твоих избавляющая;
     Pадуйся, удары молнии и грома от главы нашея отводящая.
     Радуйся, юродивую мудрость века сего посрамляющая;
     Pадуйся, пути спасения заблудшим показующая.
     Радуйся, грешным к Богу дерзновение дарующая;
     Pадуйся, изнемогающим в напастех, скорбех и искушениях скоро помогающая.
     Радуйся, в посте и молитве и Богомыслии пребывающим присно спребывающая;
     Pадуйся, блага земная, суетная и скоро преходящая презирати нас научающая.
     Радуйся, к небесным и вечным сокровищам умы и сердца наша возводящая.
     Радуйся, Благодатная Целительнице душ и телес наших. 



Кондак 5
     Свет небесный озари храмину болящего клирика егда предстала еси, Преблагая Владычице, даровати ему исцеление от лютого недуга. О, Пресвятая Госпоже Богородице, просвети помраченных многими грехами души наша и подаждь исцеление болезнующим телесем нашим, да прославляя Твоя милости вопием радостно Богу: Аллилуиа. 



Икос 5
     Видяще Тя Владычицу Богородицу пред огнезрачным престолом Пресвятыя Троицы стоящу и за христиан молящуюся, небесныя силы и вси святии от века Богу угодившии немолчными славословиями ублажают Тя. Мы же грешнии на земле любовию к Тебе подвизаеми дерзаем воспевати Тебе сице:
     Радуйся, Матернею любовию весь мир христианский объемлющая;
     Pадуйся, всех верных благая Заступнице.
     Радуйся, изрядная споборнице ведущим брань противу искушений мирских и душевредных;
     Pадуйся, от всякия злобы и вражды миром и любовию ограждающая.
     Радуйся, всех прибегающих под кров Твой приемлющая;
     Pадуйся, наставнице целомудрия и воздержания.
     Радуйся, подвижников благочестия к горнему Иерусалиму Путеводительнице;
     Pадуйся, душепагубных ересей и расколов искоренительнице.
     Радуйся, душеполезных знаний подательница;
     Pадуйся, скорая в бедах и печалех утешительница.
     Радуйся, молитвенница наша пред Сыном Твоим и Богом.
     Радуйся, Благодатная Целительнице душ и телес наших. 



Кондак 6
     Проповедует святая Православная Церковь множество чудес Твоих великия Твоя милости, Преблагая владычице, яко грады и веси ограждаеши, обители иноческия и жилища благочестивых рабов защищаеши, обидимых заступаеши, и вся благая и душеполезная ниспосылаеши всем прославляющим Тя и поющим Сыну Твоему: Аллилуиа. 



Икос 6
     Светло красуется зде Госпоже Богородице, чудотворная Твоя икона именуемая “Целительница”, прогоняющи от всех верных тьму искушений и нaпaстей и обильно источая исцеления. Сего ради во умилении зовем Ти:
     Радуйся, от неисцельных болезней скорое исцеление подаюшая;
     Pадуйся, от всяких бед и скорбей избавляющая.
     Радуйся, греховныя страсти укрощающая,
     Pадуйся, колеблющихся в вере православней укрепляющая.
     Радуйся, утешение благодатное изливающая в сердца боголюбивыя;
     Pадуйся, надеждою небесных благ верных души услаждающая.
     Радуйся, в добрых делех преуспевати нам помогающая;
     Pадуйся, от видимых и невидимых враг нас защищающая.
     Радуйся, благодатию Твоею падших восставляющая;
     Pадуйся, страх Божий в сердца наша вселяющая.
     Радуйся, вся благая прошения наша скоро исполняющая.
     Радуйся, Благодатная Целительнице душ и телес наших. 



Кондак 7
     Хотящи явити милосердие Твое неизреченное даровала еси нам Преблагая Богородице Дево, чудотворную Твою икону именуемую “Целительницею”, да вси притекающии к Ней с верою от болезней свобождаются и всякаго утешения сподобляются, сего ради вопием о Тебе Богу; Аллилуиа.

Икос 7
     Дивна и преславна дела Твоя, Пренепорочная Владычице, всем бо богатым и нищим, здравым и болящим, и с прилежною молитвою пред Цельбоносною иконою притекающим вся благая по коегождо потребе и в меру веры и любве подаеши, темже и мы не таим Твоих благодеяний, но благодарственно прославляя милости Твоя глаголем Ти сице:
     Радуйся, глухих слышание;
     Pадуйся, слепых прозрение.
     Радуйся, немых глаголание;
     Pадуйся, хромых хождение.
     Радуйся, прокаженных очищение;
     Pадуйся, расслабленных укрепление.
     Радуйся, от злых и лукавых духов свобождение;
     Pадуйся, по Бозе наше прибежище и заступление.
     Радуйся, от нужд, и печалей, и бед непреложное избавление;
     Pадуйся, пристрастие к тленному богатству искореняющая.
     Радуйся, искати богатство нетленное на небеси научающая.
     Радуйся, Благодатная Целительнице душ и телес наших. 



Кондак 8
     Странники и пришельцы в мире сем скорбнем и многомятежнем, вечнаго небеснаго отечества взыскуем и Тебе всемощную Царицу Приснодеву Богородицу смиренно просим, путеводствуй нас по стезям спасительных заповедей Сына Твоего Христа Бога нашего, да избежим сетей невидимаго врага, возможем невозбранно воспевати Вседержителю Богу песнь: Аллилуиа. 



Икос 8
     Весь мир христианский ублажает Тя Пренепорочную Деву гласы хвалебными всем верным, наипаче же болящим утешительно есть взирати на всечестную икону Твою “Целительница” именуемую. О, Пречудная Госпоже Богородице, приими и наша умиленная благохваления таковая:
     Радуйся, Радосте наша;
     Радуйся, доброто несказанная.
     Радуйся, высото добродетелей;
     Pадуйся, глубино смиренномудрия.
     Радуйся, неистощимый источнице милостей и щедрот.
     Pадуйся, благоуханный цвете Девства и чистоты.
     Радуйся, веры христианския утверждение;
     Pадуйся, нечестие обличение.
     Радуйся, горних сил похвало;
     Pадуйся, всех праведных славо.
     Радуйся, Благодатная Целительнице душ и телес наших. 



Кондак 9
     Все упование на Тя возлагаем Мати Божия и в cкopбex и болезнех ко святой иконе Твоей с благоговением и верою притекаем, чающе от Нея скоро утешение и исцеление получити. O, Пресвятая Царице Богородице, воззри милостивно на нас смиренных рабов твоих и ускори исполнити вся яже на пользу нам в сей жизни и в будущей. Да прославляя Твое благоутробие воспеваем Творцу Богу: Аллилуиа. 



Икос 9
     Ветии многовещаннии не возмогут достойно восхваляти Тя, Пречистую Деву Честнейшую Херувим и Славнейшую без сравнения Серафим, безсеменно рождшую Спaca душ наших. Мы же аще и немощнии, обаче любовию к Тебе побеждаеми, отверзаем недостойныя уста своя на похвалу Тебе сицевая:
     Радуйся, чудес Христовых начало;
     Pадуйся, исполнение всех пророчеств.
     Радуйся, чистотою Ангелов превосшедшая;
     Pадуйся, девство и рождество в себе чудно сочетавшая.
     Радуйся, в обою непорочно и свято себе сохраньшая.
     Pадуйся, Мати Сына Божия и Бога Вышняго.
     Радуйся, падшему человечеству отверзшая вход в Царствие горнее;
     Pадуйся, тихое пристанище от бурь плавающих по морю житейскому.
     Радуйся, Богом дарованная отрадо страждущим;
     Pадуйся. сияющая благодатию и славою предивных знаний и чудес.
     Радуйся, Благодатная Целительнице душ и телес наших. 



Кондак 10
     Спасти хотя весь род человеческий от беззаконий и вечныя муки, Человеколюбец Господь Тя Матерь Свою дарова в помощь, покров и защиту верующим в Негo, прославляя таковое милосердие о нас грешных благодарственным сердцем и устны вопием Ему: Аллилуиа. 



Икос 10
     Стена еси необоримая и заступления крепкое, Богородице Дево, всем с молитвою к Тебе прибегающим. Тем же убо и нас недостойных огради от лютых болезней и от всякаго злаго обстояния и подаждь во всех делех благовременную помощь и укрепление взывающим Ти:
     Радуйся, Заступнице наша и похвало;
     Paдуйся, хранительнице наша и утверждение.
     Радуйся, Отрадо наша и дивное о нас попечение;
     Pадуйся, известное прибежище наше во всех скорбных обстояниях.
     Радуйся, младенцев воспитание.
     Pадуйся, юных наставнице целомудрия.
     Радуйся, супругам любовь и согласие подавающая;
     Pадуйся, благоговейных старцев к мирной кончине жития приводящая.
     Радуйся, верных пастырей Святыя Церкви укрепляющая и вразумляющая;
     Pадуйся, в иноческом образе подвизающимся ходатаице вечнаго радования.
     Радуйся, в мире благочестиво живущих неоставляющая Своим заступлением.
     Радуйся, Благодатная Целительнице душ и телес наших. 



Кондак 11
     Пения и мольбы всеумиленныя наши приносимыя пред цельбоносным Твоим образом, приими Приснодево Богородице, и сподоби до конца жизни нашея Единому Богу воспевати: Аллилуиа. 



Икос 11
     Светозарне сияет чудотворная икона Твоя, Мати Божия, источая верным токи исцелений благодатных, наставляя блуждающим во тьме грехов на светлый путь добродетелей и спасения. Сего ради вопием Ти хвалебныя песни таковая:
     Радуйся, осенением Твоея иконы силу вражию от всех прогоняющая;
     Pадуйся, всем прибегающим в скорбех, нуждах и болезнех скорое утешение и исцеление подавающая.
     Радуйся, чудо чудес, Одигитрие Владычице, на путь спасения наставляющая.
     Pадуйся, мирное устроение обуреваемым напастьми дарующая.
     Радуйся, чистотою Твоею чистоту жития нас научающая;
     Pадуйся, лукавых, гордых и гневливых людей вразумляющая.
     Радуйся, правую веру и страх Божий в нас вселяющая;
     Pадуйся, светом Христова учения тьму неверия прогоняющая.
     Радуйся, смущение помышлений сумнительных удаляющая;
     Pадуйся, всех духовных даров щедрая Подательница.
     Радуйся, Благодатная Целительнице душ и телес наших. 



Кондак 12
     Благодатию и щедротами Твоими, Премилосердная Владычице, не оставляеши христиан православных, даруя скорбящим утешение, обидимым заступление, болящим и всем сущим в бедах многоразличных избавление, сего ради прославляюще Тя благодарственно вопием Богу: Аллилуиа. 



Икос 12
     Поюще Твоя неизреченныя милости и чудеса являемыя нам недостойным преклоняем колена перед цельбоносным Твоим образом, Богородице Приснодево, молим Тя усердно, подаждь нам мир, тишину и благую кончину и не остави без Твоея помощи и заступления во Втором пришествии Сына Твоего и Бога нашего, всех приносящих Ти со умилением сия похвалы:
     Радуйся, в уныние и отчаяние впадших, надеждою спасения укрепляющая;
     Pадуйся, узы греховныя разрешающая.
     Радуйся, праведный на нас гнев Божий на милость прелагающая;
     Pадуйся, земное житие наше добре устрояющая.
     Радуйся, от опасных обстояний нас избавляющая;
     Pадуйся, в час кончины всем верным скорая Помощнице.
     Радуйся, чтущих Тя на мытарствах воздушных заступающая;
     Pадуйся, любовь к Тебе имущая врата райская отверзающая.
     Радуйся, прославляющих Тя вечнаго блаженства в Царствии Небесном сподобляющая.
     Pадуйся, не чтущих Тя перед всеми посрамляющая.
     Радуйся, державная скоропомощница наша во дни тяжких испытаний.
     Радуйся, Благодатная Целительнице душ и телес наших. 



Кондак 13
     О Всепетая Мати Сладчайшего Господа нашего Иисуса Христа, милостивно приими сие малое моление наше, избави нас от всякия напасти, болезни и внезапныя смерти и сподоби нас наследниками быти Царствия Небеснаго и со всеми святыми воспевати Сыну Твоему и Богу нашему: Аллилуиа.

Этот кондак читается трижды, затем икос 1-й и кондак 1-й